Створаны сэрвіс для пошуку гатэляў без рускіх турыстаў
- 4.04.2014, 16:19
Запушчаны сайт NoRussians, які прадстаўляе магчымасць пошуку гатэляў без рускамоўных адпачывальнікаў.
Карыстальнікі змогуць праглядаць і ставіць адзнакі гатэлям з пункту гледжання гасцей з краін СНД, якія адпачываюць там. Тэхналогія першасных ацэнак гатэляў працуе на падставе непрамых прыкмет і дадзеных іншых сэрвісаў, піша gazeta.ru.
Сайт NoRussians.com ужо запушчаны, але функцыя пошуку гатэляў на ім пачне працаваць у бліжэйшыя тыдні. Цяпер на ім збіраюць электронныя адрасы тых карыстальнікаў, якім было б цікава скарыстацца ім пасля запуску.
Стваральнікі сэрвісу - украінскія прадпрымальнік Максім Саванеўскі і праграміст Дзмітрый Юрчанка. Па іх словах, за суткі пасля запуску сайта ім пакінулі свае дадзеныя больш за 5 тыс. карыстальнікаў.
Ідэя сэрвісу ўзнікла ў Максіма Саванеўскага, калі ён займаўся арганізацыяй свайго адпачынку праз турагенцтва, і ва ўсіх прапанаваных яму гатэлях, мяркуючы па водгуках на сайце Booking.com, рэгулярна спынялася мноства турыстаў з Расеі.
«Большасць водгукаў аб рускамоўных турыстах былі вельмі негатыўнымі», - растлумачыў Саванеўскі.