СБУ сарвала захоп адміністрацыйных будынкаў у Мелітопалі
- 30.04.2014, 17:28
Служба бяспекі Украіны затрымала дыверсанта, які планаваў захоп органаў дзяржаўнай улады ў Мелітопалі.
Пра гэта паведамляе прэс-служба ведамства.
«У рамках антытэрарыстычнай аперацыі і недапушчэння дыверсійных дзеянняў на тэрыторыі Украіны, у горадзе Мелітопаль Запарожскай вобласці 30 красавіка СБУ затрымала грамадзяніна Украіны «Д», які падазраецца ў датычнасці да падрыхтоўкі масавых акцый пратэсту з задзейнічаннем прарасейскіх сепаратысцкіх груп», - сказана ў паведамленні.
1 траўня дыверсант планаваў арганізаваць масавыя беспарадкі на цэнтральных вуліцах Мелітопаля з наступным захопам адміністрацыйных памяшканняў органаў дзяржаўнай улады.
На дадзены момант, удакладнілі ў СБУ, вырашаецца пытанне аб абранні меры стрымання ў дачыненні да згаданай асобы ў выглядзе арышту. Адбываюцца аператыўна-следчыя дзеянні.
Нагадаем, з 6 красавіка расейскія дыверсійныя групы і мясцовыя сепаратысты пачалі планамерныя захопы будынкаў адміністрацый у гарадах усходніх абласцей Украіны. Журналісты заходніх СМІ паведамлялі, што сярод баевікоў прысутнічаюць і беларусы.
У адказ улады Украіны прынялі рашэнне аб пачатку антытэрарыстычнай аперацыі ва ўсходніх рэгіёнах краіны. На Данбас перакінулі вайскоўцаў і тэхніку. 24 красавіка ўкраінская армія пачала вызваленне Славянска.
29 красавіка сепаратысты захапілі ключавыя адміністрацыйныя будынкі ў Луганску - самым усходнім абласным цэнтры Украіны. Штурм праходзіў з выкарыстаннем агнястрэльнай зброі. Пад кантролем захопнікаў - абласная адміністрацыя, пракуратура, СБУ, МУС і тэлерадыецэнтр горада.