Тэрарысты ў Славянску пра закладнікаў: Нам патрэбная разменная манета

• 23.04.2014, 17:04

Баевікі пацвердзілі захоп закладнікаў.

Самаабвешчаны «мэр» Славянска Вячаслаў Панамароў (на фота) не збіраецца адпускаць амерыканскага журналіста Саймана Астроўскага, якога напярэдадні ўзялі ў закладнікі апалчэнцы. Пра гэта ён паведаміў карэспандэнту gazeta.ru.

«Нам патрэбныя палонныя. Патрэбна разменная манета. Шмат нашых таварышаў закрытыя. Гэтыя бяруць іх, вязуць у Кіеў, катуюць. Ну вось, і мы тое ж самае робім. Ну, у сэнсе бярэм у палон», - сказаў Панамароў.

На пытанне карэспандэнта аб тым, ці варта бацькам Астроўскага, якія звязваліся з «народным мэрам» у аўторак падчас прэс-канферэнцыі, чакаць сына ў бліжэйшы час, Панамароў заявіў: «Ды што хочуць, няхай тое і робяць. Мы на сваёй тэрыторыі».

Раней паведамлялася, што амерыканскія журналісты, якія працуюць у Славянску, не ведаюць, дзе іх калега. Яго мабільны тэлефон не адказвае, у сваім гасцінічным нумары ён таксама не з'яўляўся.

Фота: AP Photo/Sergei Grits