Лінас Лінкявічус: Меры ЕЗ супраць Расеі павінны быць больш жорсткімі

• 14.04.2014, 8:04

Санкцый, уведзеных супраць Масквы, недастаткова.

Пра гэта заявіў міністр замежных спраў Літвы Лінас Лінкявічус.

"Прынятыя меры з'яўляюцца недастатковымі, паколькі, на жаль, мы не бачым прагрэсу, не бачым намаганняў (з боку Расеі) у дачыненні да дээскалацыі сітуацыі, хутчэй, наадварот", - сказаў ён у інтэрв'ю агенцтву Інтэрфакс-Украіна напярэдадні пасяджэння Рады ЕЗ па пытаннях замежных спраў, якое пройдзе ў панядзелак, 14 красавіка, у Люксембургу.

Па словах Лінкявічуса, паступае інфармацыя ў дачыненні да ўдзелу "расейскіх прадстаўнікоў" у падзеях ва Усходняй Украіне. Ён бачыць падабенства таго, што адбываецца з нядаўнімі падзеямі ў Крыме.

"Чым далей, тым больш розных прыкмет у дачыненні да таго, што гэта - такія ж узброеныя падраздзяленні, якія бралі ўдзел у Крыме: такая ж форма, такое ж узбраенне, такія ж частоты зносінаў паміж сабой. Многія прыкметы паказваюць на ўплыў трэцяй дзяржавы, Расеі", - сказаў кіраўнік МЗС Літвы.

Лінкявічус упэўнены, меры, якія прымаюцца ЕЗ, павінны быць больш жорсткімі. "Гэта тычыцца другой фазы ў дачыненні да канкрэтных асобаў. Мы павінны зрабіць усё магчымае, каб спакой аднавіўся, і, як гэта намечана, былі праведзеныя выбары прэзідэнта 25 траўня, хоць з гэтым будзе вельмі складана, паколькі мы бачым, якія намаганні дэстабілізаваць сітуацыю", - растлумачыў ён.

Адказваючы на пытанне аб магчымасцях прымянення так званай трэцяй фазы - эканамічных санкцый, міністр адзначыў, што гэтая фаза з'яўляецца "больш складанай, так як павінна больш старанна прымяняцца". "Але такія абмежаванні, як эмбарга на зброю, ужо відавочныя, і спрэчак вакол гэтага не павінна быць. Іншыя моманты таксама павінны абмяркоўвацца, і я думаю, што Еўрапейская камісія прапануе свае варыянты", - мяркуе кіраўнік МЗС Літвы.