Крымскія сепаратысты хочуць нацыяналізаваць украінскую дзяржаўную ўласнасць
- 6.03.2014, 15:48
Таксама разглядаецца пытанне аб увядзенні расейскага рубля.
Пра гэта заявіў «віцэ-прэм'ер Крыма» Рустам Тэміргаліеў.
«Усе дзяржаўныя прадпрыемствы Украіны будуць нацыяналізаваныя і пяройдуць ва ўласнасць Крымскай аўтаноміі», - паведаміў ён.
У той жа час, паводле яго слоў, уся ўласнасць прыватнага бізнесу, уключаючы зямлю, нерухомасць, прадпрыемствы, будзе перааформленая ў адпаведнасці з расейскім заканадаўствам.
Таксама прадстаўнік сепаратыстаў заявіў, што ўлады Крыма гатовыя ўступіць у рублёвую зону, у выпадку атрымання згоды расейскага боку на далучэнне Крыма да Расеі.
«Мы гатовыя да ўвядзення рублёвай зоны», - сказаў ён.
Рустам Тэміргаліеў таксама падкрэсліў, што ўлады Крыма выканалі свае абавязацельствы перад насельніцтвам па сацыяльных выплатах у поўным аб'ёме.
«Толькі пазаўчора і ўчора мы правялі ўсе сацыяльныя выплаты, уключаючы выплаты заробкаў і пенсій», - дадаў Тэміргаліеў.
Раней Рада Крыма на закрытай пазачарговай сесіі прыняла рашэнне аб далучэнні да Расеі.