Андрэй Кобалеў узначаліў «Нафтагаз Украіны»

• 26.03.2014, 9:44

Рашэнне аб гэтым прыняў Кабінет міністраў Украіны на пасяджэнні, якое зацягнулася да пачатку серады.

Андрэй Кобалеў у 2000 годзе скончыў інстытут міжнародных адносінаў пры Кіеўскім універсітэце імя Шаўчэнкі, атрымаўшы ступень магістра міжнародных эканамічных адносінаў, перадае ""Інтэрфакс-Україна".

З 1999 па 2002 гады працаваў ва ўкраінскім падраздзяленні PricewaterhouseCoopers (PwC) кансультантам па пытаннях кіравання, спецыялізуючыся ў пытаннях стратэгічнага кіравання і карпаратыўных пераўтварэнняў.

З 2002 па 2010 гады працаваў на розных пасадах у НАК "Нафтагаз Украіны", у прыватнасці, у дэпартаменце карпаратыўных фінансаў і коштавай палітыкі дзяржхолдынга і дарадцам кіраўніка праўлення НАК. Браў удзел у рэструктурызацыі знешняга доўгу дзяржхолдынга шляхам фармальнага абмену еўрааблігацый і іншых абавязацельстваў на новыя еўрааблігацыі.

Пазней працаваў дарадцам у інвестыцыйнай кампаніі AYA Securities.

Як паведамлялася, Яўген Бакулін, які ўзначальваў "Нафтагаз Украіны" з сакавіка 2010 года, быў затрыманы 21 сакавіка 2014 года па падазрэнні ў крадзяжы сродкаў у асабліва буйных памерах. Раніцай 23 сакавіка суд прыняў рашэнне аб меры стрымання, паводле якога яго арыштуюць або запатрабуюць заклад у памеры 1,5 млрд грн.

НАК "Нафтагаз Украіны" аб'ядноўвае найбуйнейшыя нафтагазаздабыўныя прадпрыемствы краіны, з'яўляецца манапалістам па транзіце і захоўванню прыроднага газу ў падземных сховішчах, а таксама па транспарціроўцы нафты трубаправодным транспартам па тэрыторыі Украіны.