Беларусаў просяць дапамагчы ў ахове межаў

• 21.03.2014, 19:20

Жыхароў памежных тэрыторый хочуць прыцягнуць да барацьбы з кантрабандыстамі і нелегаламі.

На беларуска-польскай мяжы ў пункце пропуску « Брузгі» 21 сакавіка казалі пра бяспеку дзяржаўнай мяжы. Тут адбылася сустрэча, якая сабрала прадстаўнікоў Дзяржаўнага памежнага камітэта, генпракуратуры і мясцовай улады, паведамляе тэлеканал СТВ.

Бакі сышліся ў меркаванні, што забяспечваць надзейнасць дзяржаўнай мяжы павінны не толькі памежныя і мытныя службы. У гэтым пытанні неабходны сумесныя намаганні дзяржорганаў і сілавых структур. Акрамя гэтага ўдзельнікі сустрэчы адзначылі, што да гэтага пытання трэба больш актыўна прыцягваць і мясцовае насельніцтва.

«Далучэнне грамадзян менавіта ў ажыццяўленне памежнай бяспекі. Бо на сённяшні момант не сакрэт, што тут, у памежных раёнах, арганізоўваюць склады для тых тавараў, якія незаконна хочуць пераправіць праз дзяржаўную мяжу. Дык вось наша задача, каб кожны грамадзянін, які ведае гэтую інфармацыю, здолеў яе рэалізаваць», - заявіў Аляксандр Лашын, намеснік генеральнага пракурора Рэспублікі Беларусь.

Яшчэ адзін важны складнік - выразны і хуткі працэс афармлення дакументаў у пунктах пропуску. Для гэтага ў Беларусі створана і ўжо дзейнічае сістэма электроннага браніравання часу перасячэння мяжы. Цяпер ствараюцца сэрвісныя зоны паблізу памежных пераходаў, дзе ў камфортных умовах кіроўцы велікагрузаў будуць чакаць сваёй чаргі.