Кантроль за праходжаннем тэхагляду ўзмоцняць з 24 сакавіка
- 21.03.2014, 10:52
Прадпрыемства "Белтэхагляд", УДАІ МУС і Транспартная інспекцыя 24 сакавіка адкрыюць сумесную дэкаду "Дзяржтэхагляд", якая завершыцца 2 красавіка.
Пра гэта паведамілі БелТА ў прэс-службе РУП "Белтэхагляд".
"Асноўная мэта штогадовай акцыі - узмацненне кантролю за своечасовым праходжаннем дзяржаўнага тэхнічнага агляду і прыцягненне ўвагі аўтаўладальнікаў да пытанняў падтрымання аўтамабіляў у тэхнічна спраўным стане", - растлумачылі ў прэс-службе. Падчас сумесных рэйдаў спецыялісты будуць звяртаць увагу на аўтамабілі, якія эксплуатуюцца без дазваленчай налепкі на ветравым шкле, і на транспартныя сродкі, якія маюць відавочныя неадпаведнасці па знешнім выглядзе. Аднак, як адзначылі прадстаўнікі "Белтэхагляду", асаблівая ўвага будзе нададзеная аўтамабілям-таксі і маршруткам. Гэта звязана ў тым ліку з надыходзячым чэмпіянатам свету па хакеі ў Менску.
Пры выяўленні выпадкаў эксплуатацыі транспартных сродкаў без своечасова пройдзенага тэхагляду аўтаўладальнікаў будуць прыцягваць да адміністрацыйнай адказнасці.