У Беларусі з-за моцнага ветру былі абясточаны 1309 населеных пунктаў

• 16.03.2014, 12:26

Большасць пашкоджаных будынкаў - на тэрыторыі Гомельскай вобласці.

У перыяд з 6.00 15 сакавіка да 6.00 16 сакавіка, паводле звестак ДВА «Белэнерга», на тэрыторыі рэспублікі былі абясточаны 1309 населеных пунктаў.

Пра гэта паведамілі ў прэс-цэнтры Міністэрства ў надзвычайных сітуацыях Беларусі.

Адключэнні аператыўна ліквідуюцца аварыйнымі брыгадамі. Паводле стану на 6.00 16 сакавіка застаюцца без электразабеспячэння 152 населеныя пункты ў Берасцейскай, Гомельскай, Гарадзенскай, Менскай і Магілёўскай абласцях.

Паводле аператыўных звестак, з прычыны парываў ветру (да 20 метраў у секунду) 15 сакавіка пацярпелі 87 населеных пунктаў у 22 раёнах Берасцейскай, Гомельскай, Менскай і Магілёўскай абласцей. Пашкоджаны дахі 41 жылога дома, 8 аб'ектаў сацкультбыту, 109 сельскагаспадарчых будынкаў (6 адноўленыя). Пацярпелых няма.

«Аварыйнымі брыгадамі вядуцца аднаўленчыя работы. Большасць пашкоджаных будынкаў - на тэрыторыі Гомельскай вобласці», - адзначылі ў прэс-цэнтры МНС.