Будынак Данецкай АДА штурмуюць прарасейскія актывісты

• 1.03.2014, 15:23

Раней на мітынгу на плошчы Леніна прарасейскія актывісты заклікалі ўсталяваць намётавы гарадок ля будынка АДА і абралі новага «губернатара».

Прарасейскія актывісты штурмуюць будынак Данецкай аблдзяржадміністрацыі, знялі сцяг Украіны. Журналісты і рэгіяналы ўзятыя ў аблогу ўнутры будынка, іх ахоўвае міліцыя. Актывісты знялі сцяг Украіны з флагштока перад АДА і ўзнялі расейскі трыкалор.

Як паведамляюць Навіны Данбаса, раней на мітынгу на плошчы Леніна прарасейскія актывісты заклікалі сваіх прыхільнікаў усталяваць намётавы гарадок ля будынка АДА і абралі новым «губернатарам» Паўла Губарава, які запатрабаваў ад сілавікоў даць прысягу на вернасць «народнай уладзе».

Паводле стану на 13.30 ля будынка Данецкай АДА знаходзіцца блізу 4 тысяч чалавек, якія прынеслі вялікі сцяг Расеі, выкрыкваюць «Расея», «Слава Беркуту». Сцяг Украіны ля будынка ДанАДА знялі актывісты забароненай арганізацыі «Данецкая рэспубліка».