Дзярждума РФ забароніць працаваць без дыплома

• 3.12.2014, 9:47

Дзярждума забароніць грамадзянам Расеі працаваць па спецыяльнасці без дыплома.

Законапраект можа быць прыняты да канца года, піша «Коммерсант».

Чакаецца, што ў 2016 годзе такія абмежаванні закрануць дзяржслужачых, а з 2020 - усіх астатніх грамадзян Расеі.

Са слоў кіраўніцы камітэта ў працы і сацыяльнай палітыцы Дзярждумы Вольгі Баталінай, дакумент будзе разгледжаны да другога чытання на наступным тыдні. Папраўкі, прынамсі, прадугледжваюць абавязковае ўжыванне прафесійных патрабаванняў да работнікаў па ўзроўні адукацыі, стажу працы і набору ўменняў.

Чыноўнікі Мінпрацы РФ сцвярджаюць, што колькасць прафесійных стандартаў да канца года ўзрасце з цяперашніх 199 да 350. Улетку былі зарэгістраваныя такія стандарты, як «карэспандэнт СМІ» і «рэдактар СМІ». Вылучаюцца два тыпы рэдактараў. Адны павінны займацца «працай над зместам публікацый» і мець досвед працы карэспандэнтам не менш за 6 месяцаў і ступень бакалаўра «ў галіне СМІ». Іншыя - арганізоўваць працу рэдакцыі, у тым ліку адказваць за «ўсталяванне і падтрыманне кантактаў са знешнім асяроддзем» і мець трохгадовы досвед рэпарцёрскай або рэдактарскай працы.

Пра тое, што прафесійныя стандарты павінны стаць абавязковымі для дзяржаўных арганізацый, заявіў у снежні мінулага года прэзідэнт РФ.