У Берасці з'явілася «марсіянская» ёлка

• 19.12.2014, 20:38

Задумка, якая спачатку выглядала як поўнае глупства, рэалізавалася ў даволі арыгінальную ідэю.

На скрыжаванні Бульвара Касманаўтаў і праспекта Машэрава "прызямлілася" "іншапланетная ёлка". Ну а невялікія снегавікі-іншапланецяне ўжо некалькі дзён займаюць свае законныя, з гэтага часу, месцы на капялюшыках вулічных ліхтароў, паведамляе "Віртуальны Брэст".

Гэта - адна з новых дызайнерскіх ідэй, якая рэалізуецца сіламі Берасцейскага гарсвятла. Самі работнікі кажуць, што звычайная лясная прыгажуня далася б ім значна лягчэй, з навінкай больш валтузні, але вынік, несумненна, уражвае. Мы знялі амаль увесь працэс "прызямлення", і чытачы партала Віртуальны Брэст могуць першымі ацаніць, што атрымалася ў выніку. Увесь сённяшні вечар ішоў мантаж гірлянд, і а 12-й ночы елка паўстала ва ўсёй сваёй красе.

Завяршаюцца работы і каля ЦУМа, там таксама ўстаноўленая незвычайная ёлка, нехта нават пусціў слых, што яна нібыта каштуе велізарных грошай. Сцвярджаць не будзем, хутчэй за ўсё звычайная "ўтка", з выгляду так цалкам сабе "эканомнае рашэнне". Але таксама сімпотнае, праўда толькі ноччу, калі свеціцца. Фатаграфіі не вельмі добра перадаюць эфект, які атрымаўся, таму ўбачыце самі, ацэніце.