Украінцы змогуць ездзіць у Еўропу без віз з восені 2015
- 1.12.2014, 11:10
Грамадзяне Украіны змогуць ездзіць у краіны Еўразвязу без атрымання віз па біяметрычных пашпартах ужо пачынаючы з верасня-кастрычніка 2015 года.
Пра гэта ў эфіры «Подробностей недели» заявіла намесніца міністра замежных спраў Украіны Алена Зеркаль.
«Мы настроеныя на тое, каб у траўні выйсці на пастанову ЕЗ аб надаванні Украіне бязвізавага статусу, а ў верасні-кастрычніку - каб украінцы змаглі падарожнічаць з біяметрычнымі пашпартамі і без неабходнасці атрымліваць візы», - паведаміла намесніца кіраўніка МЗС.
Са слоў Зеркаль, шмат у чым пастанова Еўропы ў гэтым пытанні будзе залежаць ад палітыкі Украіны.
«Першае патрабаванне - гэта біяметрычныя пашпарты, гэта запланавана на студзень месяц. Сумеснымі намаганнямі мы зможам дамагчыся поспехаў. Шмат што залежыць ад органаў, якія працуюць унутры Украіны», - падкрэсліла дыпламатка.
Выдачу дакументаў новага ўзору - біяметрычных пашпартоў - ва Украіне плануюць пачаць з 1 студзеня 2015 года.