Тэрарысты абстрэльваюць з мінамётаў і «Градаў» Луганскую вобласць

• 8.11.2014, 12:53

За мінулыя суткі тэрарысты так званай ЛНР 21 раз абстралялі з мінамётаў, артылерыі і сістэм залпавага агню «Град» падкантрольную Украіне тэрыторыю Луганскай вобласці.

Пад абстрэлы трапілі населеныя пункты Крымскае, Сакольнікі, Трохізбенка, Кракаўка, Стары Айдар, Арэхава-Данецкае, Чарнухіна, Горнае, Ніжняе і Станіца Луганская. Пра гэта паведамляе афіцыйны сайт старшыні Луганскай АДА Генадзя Маскаля.

«Ахвяр сярод грамадзянскага насельніцтва няма, аднак разбураны шэраг аб'ектаў інфраструктуры. У выніку абстрэлаў абясточанымі застаюцца Станічна-Луганскі раён і два населеныя пункты Папаснянскага раёна. Адключаныя ад газазабеспячэння вёскі Трохізбенка, Кракаўка, Сакольнікі Новаайдарскага раёна, а таксама сяло Чарнухіна Папаснянского раёна. Праз адсутнасць току без цэнтральнага цепла- і водазабеспячэння засталася Станіца Луганская», сказана ў паведамленні.

Аднавіць пашкоджаную інфраструктуру і забяспечыць людзей газам, вадой і цяплом пакуль немагчыма, паколькі баевікі працягваюць абстрэлы і катэгарычна адмаўляюцца дапускаць рамонтныя брыгады аблэнэрга і Аблгаз, заявіў Маскаль.