Новая Рада пачне працу 27 лістапада

• 19.11.2014, 15:09

Першае пасяджэнне Вярхоўнай Рады VII склікання адбудзецца 27 лістапада.

Падрыхтоўчая дэпутацкая група ў арганізацыі і правядзенні пленарных пасяджэнняў першай сесіі Вярхоўнай Рады Украіны VIII склікання прыняла пастанову аб правядзенні першага пасяджэння парламента 27 лістапада. Пра гэта паведаміў кіраўнік групы, віцэ-прэм'ер-міністр, міністр рэгіянальнага развіцця, будаўніцтва і жыллёва-камунальнай гаспадаркі, прадстаўнік партыі "Блок Пятра Парашэнкі" Уладзімір Гройсман, паведамляе "Корреспондент".

"Мы сёння разгледзелі надзвычай важнае пытанне і прынялі па ім пастанову кансалідавана. Хачу яе абвясціць: першае пасяджэнне ўкраінскага парламента адбудзецца 27 лістапада гэтага года", - сказаў ён на брыфінгу ў сераду, 19 лістапада.

Са слоў Гройсмана, ёсць прапанова, каб у прэзідыуме на першым пасяджэнні сесіі парламента новага склікання былі прадстаўнікі ўсіх фракцый. Ён таксама нагадаў, што згодна з заканадаўствам, у першы дзень работы сесіі будуць сфарміраваны камітэты парламента.

"У заканадаўстве Украіны вызначаны поўны пералік пытанняў, якія разглядаюцца на першым пасяджэнні, а гэта пытанні камітэтаў. Што тычыцца пытанняў фарміравання ўрада і камітэтаў, гэтыя пытанні будуць разглядацца, калі ўсе дэпутаты прымуць прысягу і вызначацца што да прапаноў кааліцыйнага пагаднення і фарміравання кааліцыйнага ўрада. Цяпер гэтае пытанне не актуальнае", - адзначыў Гройсман, дадаўшы, што наступнае пасяджэнне падрыхтоўчай групы адбудзецца заўтра, 20 лістапада. "Наступнае пасяджэнне падрыхтоўчай групы ў арганізацыі першага пасяджэння парламента адбудзецца заўтра а 15:00", - сказаў Гройсман.

Раней кіраўнік Вярхоўнай Рады Украіны Аляксандр Турчынаў прагназаваў, што парламент новага склікання можа пачаць працу ўжо 2 снежня, але ва ўсякім выпадку запрацуе не пазней за 15 снежня.