«Аэрафлот» вярнуў TEZ Tour доступ да сістэмы браніравання
- 14.11.2014, 17:00
Турыстычная кампанія выплаціла запазычанасць перад авіяперавозчыкам.
«Аэрафлот» урэгуляваў адносіны з турыстычным аператарам TEZ Tour, паведаміў «Інтэрфаксу» прадстаўнік «Аэрафлота». З ягоных слоў, кампанія TEZ Tour выплаціла існуючую запазычанасць перад авіяперавозчыкам і з сённяшняга дня зноў падключана да сістэмы браніравання білетаў «Аэрафлота».
Напярэдадні прадстаўнік «Аэрафлота» паведаміў, што TEZ Tour быў адключаны ад сістэмы браніравання авіябілетаў праз запазычанасць у памеры 30 млн рублёў. Але гендырэктар TEZ Tour назваў паведамленне пра запазычанасць не адпавядаючым рэчаіснасці, адзначыўшы, што «Аэрафлот» не накіроўваў да іх афіцыйную паперу з паведамленнем пра запазычанасць. Акрамя таго, з ягоных слоў, сума ў 30 млн рублёў, улічваючы аб'ёмы бізнэсу абедзвюх кампаній, «смяхотна малая, для таго, каб паслужыць прычынай адключэння ад сістэмы браніравання рэйсаў».
Пра намер адключыць турыстычнага аператара ад сістэмы браніравання ў «Аэрафлоце» заявілі ў сераду, патлумачыўшы гэта тым, што кампанія перастала аплачваць паслугі авіяперавозчыка.
У TEZ Tour падкрэслівалі, што ў тураператара няма запазычанасці перад «Аэрафлотам», а адключэнне ад сістэмы браніравання звязана з тым, што кампаніі не дамовіліся аб аб'ёмах перавозак. «Два тыдні мы ўжо змагаемся з імі, быццам бы дасягнулі дамоўленасцей, і вось такая навіна», - сказаў гендырэктар TEZ Tour Уладзімір Каганер.
«Мы з імі гандлюемся, спрабуем скараціць аб'ёмы, а яны не хочуць скарачаць і спрабуюць нас шантажаваць. Пры гэтым ні капейкі запазычанасці ў нас няма. Усе квіткі, якія забраніраваныя, выпісаныя, і народ паляціць... Але новых квіткоў «Аэрафлота» мы на сёння выпісаць не можам, бо нас адключылі, спрабуючы такім чынам шантажаваць, каб мы пагадзіліся на выкананне непасільнага аб'ёму», - заявіў Каганер.
З ягоных слоў, самалёты цяпер лётаюць паўпустыя, але «Аэрафлот» не хоча здымаць лішнія рэйсы. Гаворка ідзе пра блокі на Мале (Мальдывы), Бангкок і Пхукет (Тайланд). Пры гэтым тураператар працуе на гэтых кірунках і з іншымі авіякампаніямі - «Трансаэра», «Сібірру» і г.д., так што забраняваўшых туры перасадзяць на гэтыя рэйсы.
Як паведаміла прэс-сакратар Расейскага саюза туріндустрыі (РСТ) Ірына Цюрына, доля перавозак на «Аэрафлоце» ў TEZ Tour невялікая.
«Для іх гэта не глабальны перавозчык... Авіякампанія на іх цісне. Я спадзяюся, што тураператар зможа перажыць гэты цяжкі час, нават калі дамовіцца не ўдасца, бо ён можа прапанаваць турыстам іншую перавозку, акрамя «Аэрафлота», - сказала Цюрына.
«Аэрафлот» ужо адключыў ад сістэмы браніравання авіябілетаў некалькіх тураператараў, такіх як «Ідэал Тур» і «Капітал Тур», якія пасля спынілі сваю дзейнасць. З TEZ Tour «Аэрафлот» працуе з 2000 года.