Псіхолагі высветлілі, што рэп дапамагае перамагчы дэпрэсію

• 13.11.2014, 15:55

Такая музыка робіць станоўчае ўздзеянне на псіхіку.

На гэтым тыдні ў навуковым часопісе The Lancet была апублікаваная тэорыя псіхолагаў з Кембрыджскага ўніверсітэта, згодна з якой выкананне рэпу можа прынесці карысць тым, хто мае псіхалагічныя праблемы, паведамляе NEWSru Israel са спасылкай на The Guardian.

Звычайна музыку ў гэтым стылі крытыкуюць за тое, што яна прапаведуе ідэі аб багатым жыцці, дарагой вопратцы, модных аўтамабілях і велізарных хатніх кінатэатрах, аднак менавіта такія палёты фантазіі могуць аказваць станоўчае ўздзеянне на псіхіку, мяркуюць навукоўцы.

Як адзначаюць кансультант-псіхіятр Акім Суле і клінічны неўролаг Бэкі Інкстэр, першапачаткова хіп-хоп-музыка з'явілася ў раёнах з нізкім сацыяльна-эканамічным узроўнем жыцця і тэксты песень адлюстроўвалі праблемы, з якімі сутыкаліся людзі, што выраслі ў гэтых раёнах.

Песні ў стылі хіп-хоп апавядаюць пра гісторыі хуткага ўзбагачэння і звычайна суправаджаюцца пазітыўнымі візуальнымі вобразамі - фантазіямі аб месцах, дзе выканаўца хацеў бы апынуцца, аб аўтамабілі, якім ён хацеў бы валодаць. Гэта з'яўляецца аналогіяй распаўсюджанай псіхатэрапеўтычнай методыкі, згодна з якой кліент павінен прадставіць тое жыццё, якім ён хацеў бы жыць, што само па сабе палягчае шлях да мэты і дапамагае здабыць надзею.

Паводле звестак навукоўцаў, тэрапеўтычная роля рэпу, як і іншых формаў мастацкага выказвання, мае мноства дакументальных пацверджанняў і асабліва ярка выяўляецца сярод тых, хто знаходзіцца ў дэпрэсіі. Яны спадзяюцца, што іх даследаванне яшчэ раз дакажа, наколькі карысна самавыяўленне ў форме песень, і дазволіць дадаць рэп у спіс тэрапеўтычных сродкаў.