«Кубань» абвергла інфармацыю аб адстаўцы Ганчарэнкі

• 12.11.2014, 19:11

Інфармацыя аб звальненні галоўнага трэнера "Кубані" Віктара Ганчарэнкі не адпавядае рэчаіснасці.

Пра гэта ТАСС заявіў генеральны дырэктар краснадарскага футбольнага клуба Яўген Мураўёў.

"Ганчарэнка прадаўжае працу на пасадзе галоўнага трэнера каманды. У нас няма перадумоў для ягонага звальнення", - сказаў Мураўёў.

Спецыяліст узначаліў "Кубань" у кастрычніку 2013 года. Кантракт з Ганчарэнкам быў падпісаны на чатыры з паловай гады.

Пасля 13 тураў чэмпіянату Расеі сезона-2014/15 краснадарскі клуб займае пятае месца ў турнірнай табліцы. Ад маскоўскага ЦСКА, які займае другую пазіцыю, клуб аддзяляе адно ачко.

У розыгрышы Кубка Расеі "Кубань" прадаўжае барацьбу за трафей, выйшаўшы ў чвэрцьфінальную стадыю розыгрышу.

Інфармацыю аб адстаўцы беларускага спецыяліста распаўсюдзіў сёння партал OneDivision.ru. Паводле звестак партала, Віктар Ганчарэнка сёння развітаўся з камандай.

Адзначым, што чуткі аб адстаўцы суправаджаюць Ганчарэнку яшчэ з вясны, калі скончыўся мінулы чэмпіянат Расеі. Між тым "Кубань" у гэтым чэмпіянаце пацярпела ўсяго 1 паражэнне ў 13 матчах.