Пад Берасцем дзяўчына на Mercedes перавысіла хуткасць на 104 км/гадзіну

• 9.10.2014, 17:20

Парушальніца хацела абагнаць грузавік.

Як паведаміла начальніца аддзялення агітацыі і прапаганды ДАІ УУС Берасцейскага аблвыканкама Наталля Сахарчук, кіроўца 1974 года нараджэння, рухаючыся па вуліцы Столінскай у вёсцы Хлябы Пінскага раёна на аўтамабілі Mercedes ML 350, развіла рэкордную для гэтага года хуткасць у населеным пункце. Гэта ўжо не першае парушэнне хуткаснага рэжыму гэтай кіроўцай, раней дзяўчына перавышала хуткасць на 20 км/г, піша «Рэальны Брэст».

У салоне парушальніцы знаходзілася дзіця. На пытанне супрацоўнікаў Дзяржаўтаінспекцыі, навошта яна так разагналася, адказала: «Мне там грузавік перашкодзіў, вось я яго і абагнала трохі».

Да грубых і найбольш частых парушэнняў правілаў руху, якія прыводзяць да страшных ДТЗ, адносяцца кіраванне аўтамабілем у нецвярозым стане і перавышэнне дапушчальнай хуткасці. Таму Дзяржаўтаінспекцыя карае такіх кіроўцаў па ўсёй строгасці закона. Кіроўцы пагражае штраф паводле часткі 4 артыкула 18.13 да 15 базавых велічынь з пазбаўленнем пасведчання кіроўцы тэрмінам да 1 года.