Станіслаў Шушкевіч падзякаваў невядомаму добразычліўцу

• 24.10.2014, 14:53

Першы кіраўнік незалежнай Беларусі распавёў пра незвычайную гісторыю, якая працягваецца ўжо больш за год.

Станіслаў Шушкевіч патэлефанаваў у рэдакцыю charter97.org, каб з дапамогай сайта падзякаваць невядомаму добразычліўцу, які на працягу ўсяго гэтага часу рэгулярна дапамагаў яму з аплатай тэлефонных размоў.

«Невядомы мне чалавек наважыў, што можа дапамагчы мне, - распавёў ён. - Амаль цэлы год штомесяц, а бывае, што і часцей атрымліваю на свой тэлефонны рахунак шасцізначную суму ў беларускіх рублях. Я фактычна не марную сваіх грошай на сувязь. Мне гэта вельмі прыемна, аднак, на жаль, імя гэтага чалавека я не ведаю. Таму я не мог яму ніяк аддзячыць. Таму праз ваш сайт хацелася б сказаць яму «дзякуй» за дапамогу».

Нагадаем, афіцыйная пенсія Станіслава Шушкевіча складае 3200 беларускіх рублёў (каля 30 цэнтаў). Прычынай гэтага стала скасаванне Лукашэнкам у 1997 годзе пастановы парламента аб пажыццёвай пенсіі былому прэм'еру і кіраўніку дзяржавы ў памеры 70-75% ад акладу дзеючых прэм'ера і спікера і падпісанне ім дэкрэта аб «упарадкаванні пенсій за асаблівыя заслугі перад беларускім народам». Пецярым былым кіраўнікам незалежнай Беларусі, у тым ліку і Станіславу Шушкевічу, гэтым дэкрэтам пенсія была пакінутая на тым узроўні, на якім знаходзілася на момант падпісання дакумента.