Украіна яшчэ на год атрымала гандлёвыя льготы ад ЕЗ
- 23.10.2014, 14:33
Еўрапарламент падтрымаў падаўжэнне аўтаномных гандлёвых мер для Украіны да 31 снежня 2015 года.
У чацвер, 23 кастрычніка, Еўрапейскі парламент падтрымаў праект рэгулявання ЕЗ, які прадугледжвае падаўжэнне на адзін год - да 31 снежня 2015 - дзеянні аўтаномных гандлёвых мер у дачыненні да Украіны, піша «Інтэрфакс».
За праект дакладу Габрыэліуса Ландсбергіса падчас сесіі Еўрапарламента ў Страсбургу прагаласавалі 497 дэпутатаў, супраць - 78, устрымаліся - 56.
Як паведамлялася, на пленарнай сесіі Еўрапарламента ў Страсбургу планавалася правесці галасаванне ў пытанні падаўжэння Еўразвязам да канца 2015 года аднабаковых гандлёвых прэферэнцый для Украіны. Яны былі ўведзеныя 23 красавіка гэтага года на шэсць месяцаў, а на змену ім павінна была прыйсці зона свабоднага гандлю ў рамках ратыфікаванага раней Пагаднення аб асацыяцыі Украіны з ЕЗ. Аднак Масква, Брусэль і Кіеў дамовіліся адкласці стварэнне гэтай зоны свабоднага гандлю да пачатку 2016 году.
Раней профільны камітэт ЕП не змог па паскоранай працэдуры ўхваліць падаўжэнне гандлёвых прэферэнцый для Украіны. Як паведаміў дакладчык у гандлёвых дачыненнях паміж ЕЗ і Украінай, літоўскі дэпутат Габрыелюс Лансбергіс, парламентарыі ад Нямеччыны, Італіі, Вялікай Брытаніі і Францыі - Гельмут Шольц, Давід Барэлі, Уільям Дартмут і Марын Ле Пен - сфармавалі блакавальную меншасць у камітэце, вымусіўшы тым самым перанесці слуханні на 20 кастрычніка.
Увядзенне вясной аднабаковых прэферэнцый у гандлі з Украінай мела на ўвазе скасаванне парадку 95% тарыфаў, якія ўжываліся ў ЕЗ пры імпарце ўкраінскіх прамысловых тавараў. Акрамя таго Еўразвяз адмяніў тарыфы на больш чым 80% фермерскай прадукцыі з Украіны. Пры гэтым Брусэль, каб не нашкодзіць інтарэсам еўрапейскіх вытворцаў, пакінуў за сабой права абмяжоўваць увоз злакаў, свініны, ялавічыны, свойскай птушкі і бакалеі. Акрамя таго Кіеву, згодна з прынятай умовай, нельга павялічваць мытныя тарыфы на імпарт еўрапейскай прадукцыі.
Паводле ацэнак ЕЗ, гэтыя гандлёвыя прэферэнцыі павінны былі б дапамагчы ўкраінскім экспарцёрам зэканоміць да канца года парадку 487 мільёнаў еўра.