Кітайцы ўзламалі iOS 8.1 праз паўтара дня пасля рэлізу

• 22.10.2014, 19:06

Кітайскія праграмісты паведамілі аб выпуску джэйлбрэйка для прылад пад кіраваннем аперацыйнай сістэмы iOS 8.1.

Праз небяспеку выдалення фатаграфій з мабільных прылад Apple хакеры з Pangu на некаторы час знялі ўстановачны пакет з публікацыі, аднак у цяперашні час спасылка для загрузкі зноў працуе, піша onliner.by.

Запуск файла магчымы толькі ў асяроддзі Windows і мае інтэрфейс на кітайскай мове. Гэты джэйлбрэйк прызначаны для iPhone 6, 6 Plus, iPad Air 2 і больш ранніх прылад Apple, сумяшчальных з актуальнай версіяй АС. Асноўным мінусам з'яўляецца тое, што з ім не ўсталёўваецца каталог прыкладанняў Cydia - ягонай сумяшчальнай з iOS 8 версіі пакуль няма.

Некаторыя карыстальнікі не рэкамендуюць спяшацца з устаноўкай джэйлбрэйка ад Pangu, даўшы час распрацоўнікам на выпраўленне ўсіх «багаў».