Парламент Вялікабрытаніі прызнаў дзяржаўнасць Палестыны

• 14.10.2014, 15:37

Брытанскія заканадаўцы прагаласавалі за прызнанне дзяржаўнасці Палестыны.

Дэпутаты Палаты супольнасцяў 274 галасамі "за" пры 12 "супраць" падтрымалі рэзалюцыю, якая заклікае брытанскі ўрад "прызнаць дзяржаву Палестына разам з дзяржавай Ізраіль", паведамляе «Голас Амерыкі».

Прэм'ер-міністр Дэвід Кэмеран ды іншыя лідэры ўрада ўстрымаліся ад галасавання. Усяго ў галасаванні ўдзельнічала менш за палову з 650 дэпутатаў палаты.

Аднак рэзалюцыя знайшла падтрымку сярод прадстаўнікоў як кіроўнай кааліцыі, так і апазіцыі. Яе прыхільнікі кажуць, што яна будзе спрыяць пачатку мірнага працэсу пасля гадовай вайны ў Газе, якая забрала жыцці больш за 2100 палестынцаў - галоўным чынам, мірных жыхароў - і 70 ізраільцаў, пераважна жаўнераў.

Дэпутат Кансерватыўнай партыі Нікалас Соумс, унук брытанскага прэм'ера часоў Другой сусветнай вайны Уінстана Чэрчыля, заявіў, што "прызнанне Палестыны з'яўляецца правільнай пастановай з маральнага пункту гледжання і адказвае нашым нацыянальным інтарэсам".

Урад заявіў, што галасаванне не адаб'ецца на афіцыйнай дыпламатычнай пазіцыі Вялікабрытаніі. Міністр у справах Блізкага Усходу Табіяс Элвуд заявіў, што Злучанае Каралеўства прызнае палестынскую дзяржаўнасць, калі гэта будзе спрыяць усталяванню міру.