«Рэгіянал» - журналістам: Будзьце гатовыя, што вам разаб'юць камеру (Відэа)

• 28.01.2014, 10:33

Кіраўнік Харкаўскай аблдзяржадміністрацыі Міхаіл Добкін абвінаваціў незалежных журналістаў у замбаванні.

Ён звярнуўся да карэспандэнтаў незалежнага «5-га канала» і заявіў пра тое, што ў сувязі з іх актыўнай прафесійнай дзейнасцю падчас грамадзянскіх канфліктаў ім могуць пашкодзіць тэхніку. Пра гэта Міхаіл Добкін заявіў на прэс-канферэнцыі, каментуючы напад невядомых на супрацоўнікаў СМІ, якія адбыліся ў апошнія дні ў Харкаве, перадае «Цензор.НЕТ».

«Асабіста ваш тэлеканал з'яўляецца актыўным удзельнікам усіх супрацьпраўных дзеянняў, якія адбываюцца ў нашай краіне. Так як вы падаеце інфармацыю, так як вы замбіруеце людзей, трэба яшчэ навучыцца. Таму калі вам раптам дзесьці паламалі камеру - гэта, вядома, дрэнна. Але вы павінны разумець, што тыя, хто падчас вайны здымаў бітвы, яны таксама свае жыцці падвяргалі небяспецы... Таму, калі вы хочаце чагосьці вельмі добрага ў вашай прафесіі - будзьце гатовыя, што хтосьці зломіць вам камеру», - адзначыў Міхаіл Добкін.

Нагадаем, прадстаўнікі незалежных СМІ неаднаразова падвяргаліся нападам з боку сілавікоў і «цітушак». Сярод пацярпелых былі і беларускія журналісты. Учора ў Чаркасах затрымалі і збілі супрацоўнікаў тэлеканала «Белсат», а раней некалькі карэспандэнтаў з нашай краіны атрымалі раненні падчас сутыкненняў на вуліцы Грушэўскага ў Кіеве.