Улады зэканомяць на пенсіянерах

• 2.01.2014, 9:17

Працоўная пенсія цяпер налічваецца толькі тым беларусам, хто плаціў унёскі ў ФСАН больш за 10 гадоў.

Такое патрабаванне ўстаноўлена ўказам ад 3 верасня 2013 года №389 «Аб некаторых пытаннях пенсійнага забеспячэння і сацыяльнага страхавання», які ўступіў у сілу 1 студзеня 2014 года.

Па словах спецыялістаў, па заканадаўстве былога СССР усе працуючыя грамадзяне падлягалі дзяржаўнаму сацыяльнаму страхаванню. Адпаведна перыяды такой працы будуць уключацца ў патрабаваныя 10 гадоў мінімальнага страхавога стажу нароўні з перыядамі выплаты ўнёскаў у Фонд сацыяльнай абароны насельніцтва (ФСАН).

Нормы ўказа №389 не датычацца датэрміновых пенсій па ўзросту, прызначаных бацькам інвалідаў з дзяцінства, шматдзетным маці (нарадзілі 5 і больш дзяцей), інвалідам з дзяцінства і некаторым іншым катэгорыям грамадзян у адпаведнасці з артыкуламі 17-22 Закона Рэспублікі Беларусі «Аб пенсійным забеспячэнні». Для іх захаваныя ранейшыя ўмовы па мінімальным страхавым стажы - не менш за 5 гадоў. Таксама не змяняюцца ўмовы для прызначэння працоўных пенсій па інваліднасці і з нагоды страты карміцеля, падкрэслілі ў міністэрстве.

Раней гэты крытэр абмяжоўваўся 5 гадамі.

У дакуменце адзначаецца, што гэтае рашэнне прынята «ў мэтах рацыяналізацыі выдаткаў сродкаў дзяржаўнага сацыяльнага страхавання».

Умова аб наяўнасці 10-гадовага мінімальнага стажу працы з выплатай унёскаў будзе прымяняцца толькі да новых прызначэннях пенсій, гэта значыць пры прызначэнні пенсій па ўзросце і за выслугу гадоў пачынаючы з 1 студзеня 2014 года. Пенсіі, прызначаныя да гэтай даты, з улікам дадзенай умовы пераглядацца не будуць, рэзюмавалі ў галоўным упраўленні пенсійнага забеспячэння Мінпрацы і сацабароны.