Аматар п'янай язды ўпершыню трапіў за краты

• 5.09.2013, 17:00

Кіроўца, затрыманы за рулём п'яным і раней чатыры разы судзімы за аналагічныя злачынствы, трапіў у турму.

4 верасня 34-гадоваму менчуку было прад'яўленае абвінавачванне, у дачыненні да яго абраная мера стрымання ў выглядзе заключэння пад варту, піша БелаПАН.

Злачынства было здзейснена ноччу 1 верасня. Мужчыну Дзяржаўтаінспекцыя затрымала п'яным, без правоў, за рулём чужога «Фольксвагена-Транспарцёра», на якім ён пасля сваркі з жонкай паехаў у краму за цыгарэтамі. У крыві парушальніка апынулася 2 праміле алкаголю. У дачыненні да яго была распачатая справа па ч. 2 арт. 317 заўв. Крымінальнага кодэкса.

У ходзе разбору высветлілася, што затрыманы ўжо чатыры разы быў судзімы за аналагічныя злачынствы - адзін раз у 2009 годзе і тройчы ў 2011 годзе. Яму прызначалася абмежаванне волі без накіравання ў выпраўленчую ўстанову адкрытага тыпу са штрафам і пазбаўленнем пасведчання кіроўцы.

Заключэнне пад варту было ўжыта да абвінавачанага, паколькі іншыя меры не падзейнічалі. Максімальнае пакаранне, якое яму пагражае, - два гады пазбаўлення волі.