Павел Левінаў: Выбух каля віцебскага КДБ можа быць правакацыяй уладаў
- 25.09.2013, 17:42
Галоўным аргументам на карысць абвінавачванай жанчыны з'яўляецца адсутнасць зразумелага матыву злачынства.
Такім чынам віцебскі праваабаронца Павел Левінаў пракаментаваў сайту charter97.org прызнанне віны падазраванай у здзяйсненні выбуху каля будынка КДБ у Віцебску.
«У дадзеным выпадку незразумелы матыў злачынства. Што хацела гэтая жанчына даказаць выбухам і чым ёй насаліў КДБ? Вядома, што яна была судзімая, але наўрад ці яе судзіў КДБ. У такім выпадку яна павінна была быць пакрыўджаная на пракуратуру, на міліцыю, якая сваімі супрацьпраўнымі дзеяннямі дастаўляла ёй пакуты», - лічыць праваабаронца.
Ён падкрэсліў, што з самага пачатку неадназначна ставіўся да гэтай гісторыі.
«Бо паглядзіце ўважліва, як атрымліваецца. Па выбуху ў менскім метро нам таксама спрабавалі сказаць, што гэтыя хлопцы даўно гэтым зараблялі: шкло ў бібліятэцы ўзарвалі, у пад'ездзе таксама нешта ўзарвалі, і ўсё гэта нейкая падрыхтоўка. Але ні пра якія падрыхтоўчыя дзеянні гэтай жанчыны мы раней не чулі. Пра тое, што дзесьці нешта выбухнула, мы не ведалі. А цяпер кажуць, што яна рыхтавалася і раней нешта рабіла. Але чаму пра гэта не было вядома? А можа быць, гэта як раз-такі яна ажыццявіла тыя выбухі ў Віцебску, якія павесілі на гэтых двух хлопцаў?» - працягнуў Павел Левінаў.
Ён адзначыў, што нават Зміцер Канавалаў на папярэднім следстве не ўзяў на сябе выбухі ў Віцебску.
«А на раней судзімых людзей супрацоўнікам міліцыі, следчым органам, пракуратуры і КДБ лягчэй уздзейнічаць і лягчэй іх прымушаць. Мне цяжка верыцца ў тое, што выбух здзейсніла дадзеная жанчына. З таго моманту прайшоў амаль год. Але калі мы вернемся назад, то ўспомнім, што гэта быў час, калі нехта зноў быў не задаволены КДБ, і яму трэба было выплыць наверх і засвяціцца. Таму я не выключаю той магчымасці, што гэта была правакацыя, ажыццёўленая самой жа уладай», - сказаў праваабаронца.
Ён дадаў, што мясцовыя жыхары заўсёды абураліся тым, што ў парку каля будынка заўсёды гарэлі ліхтары і дастаўлялі ім нязручнасці.
«Але за тыдзень да выбуху яны былі патушаныя, і была проста апраметная цемра, у якой быў здзейснены выбух. Таму такія дробныя дэталі наводзяць на смутныя сумненні. Тым больш, што ўсе пакрыта таямніцай і амаль няма інфармацыі. Трэба было зрабіць усё адкрыта: публікаваць дакументы, даваць інтэрв'ю не агульнымі, а канкрэтнымі фразамі, каб зніклі ўсе падставы ў чымсьці сумнявацца. Але, як і па справе Андрэя Гайдукова, так і па справе аб выбуху каля КДБ нічога не зразумела. Таму ўзнікаюць розныя здагадкі і падазрэнні», - сказаў на заканчэнне Павел Левінаў.
Нагадаем, абвінавачаная ў здзяйсненні выбуху каля будынка КДБ у Віцебску прызнала сваю віну ў судзе.