Чамадан, вакзал, сто баксаў
- 16.09.2013, 8:32
Колькі заробяць беларускія ўлады на ўвядзенні «жалезнай заслоны»?
100 даляраў павінен будзе плаціць кожны беларус, які перасякае мяжу, у казну за так званыя выязныя візы. Такім арыгінальным спосабам Лукашэнка вырашыў адвучыць суграмадзян не толькі ездзіць у замежныя паездкі, але і пакідаць у касах замежных магазінаў каштоўную для Беларусі валюту, піша часопіс «Итоги».
«Нашы людзі да трох мільярдаў даляраў у год вывозяць за мяжу і прывозяць тавары, якія мы таксама выпускаем. Дык вось, я даручыў, аж да таго, што выязджаеш за межы за гэтым барахлом, не барахлом, не важна, - заплаці выязную пошліну», - кажа ён. А для большага постраху выпусціў яшчэ і ўказ, па якім тым грамадзянам краіны, якія працуюць за мяжой, беларуская дзяржава не будзе плаціць пенсію. Згодна з гэтым дэкрэтам для атрымання мінімальнай пенсіі беларусу давядзецца папрацаваць на карысць радзімы не менш за 10 гадоў. Новаўвядзенне ўступіць у сілу з новага года.
Логіка ў гэтых рашэннях, вядома, ёсць. «Савецкая» сістэма кіравання, якая склалася ў Беларусі, ва ўмовах жорсткага эканамічнага крызісу патрабуе аднаўлення ўсіх атрыбутаў, уласцівых саўку. І жалезная заслона - гэта неабходная опцыя, прыкладаемая да дыктатуры, дэфіцыту і чорнаму рынку валюты. Усё, як гаворыцца, уключана. А каму не падабаецца, той плаціць 100 даляраў і едзе на ўсе чатыры бакі, не разлічваючы на пенсію. Дарэчы, мяккім у параўнанні з савецкім выязны рэжым а-ля Лукашэнка выглядае толькі на першы погляд. Пры сярэднім заробку ў Беларусі ў 550 даляраў плата за выезд у 100 даляраў аказваецца стратнай. Затое дазваляе папоўніць моцна схуднелую дзяржказну. Па дадзеных справаздачы, апублікаванай беларускім Незалежным інстытутам сацыяльна-эканамічных і палітычных даследаванняў, сёння назаўжды пакінуць вотчыну Лукашэнкі мараць каля паловы грамадзян. Гэта больш за 4 мільёны 700 тысяч чалавек. Калі кожны пры гэтым заплаціць па 100 даляраў, то бюджэт атрымае 470 мільёнаў. На нявыплаце пенсій бацька заробіць яшчэ больш - сярэдні памер дапамогі па старасці ў Беларусі 170 даляраў у месяц.