Дзень ПДВ у Гомелі: бронзавая скульптура бусла апынулася ў фантане (Фота)

• 5.08.2013, 13:23

Адну з бронзавых птушак, якая ўпрыгожвала фантан на Прывакзальнай плошчы, міліцэйскі нарад знайшоў у вадзе са зламанымі нагамі.

Абставіны таго, што здарылася, у цяперашні час высвятляюцца, таму рабіць высновы яшчэ рана - кажуць праваахоўнікі. Так супала, што ўсё адбылося 2 жніўня - у дзень ПДВ. Аднак сцвярджаць катэгарычна, што прычынай гэтаму стала нечае купанне ў фантане, у міліцыі пакуль няма падстаў: не выключаецца верагоднасць таго, што бусел упаў сам - сляды разломаў знаходзяцца на месцы зваркі. Пра гэта паведамляе «Гомельская правда».

Цяпер вывучаюцца запісы камер відэаназірання, размешчаных на Прывакзальнай плошчы. У адну з іх фантан, як ужо высветлілася, не трапляе. Усе кропкі над i, удакладнілі ў АУС адміністрацыі Чыгуначнага раёна, будуць расстаўленыя на працягу дзесяці дзён. Міліцыя праводзіць праверку, шукае відавочцаў таго, што здарылася. Калі апынецца, што бронзавую кампазіцыю паламалі наўмысна, могуць распачаць крымінальную справу, і тады вінаватым пагражае сур'ёзны артыкул. Усё будзе залежаць ад сумы нанесенай шкоды.