Інтэрпол выдаў ордэр на арышт топ-мэнэджэраў БКК

• 27.08.2013, 12:15

Інтэрпол пацвердзіў выдачу міжнароднага ордэра на арышт Алега Пятрова, Канстанціна Саладоўнікава, Ігара Еўстратава і Дзмітрыя Самойлава.

Яны былі абвешчаныя ў вышук беларускім бокам. Пра гэта БелТА паведамілі ў аддзеле інфармацыі і сувязі з грамадскасцю Следчага камітэта Беларусі.

«У адрас Следчага камітэта Рэспублікі Беларусь з цэнтральных органаў Міжнароднай арганізацыі крымінальнай паліцыі (Інтэрполу), якія знаходзяцца ў г.Ліёне (Францыя), паступіла пацверджанне таго, што ў дачыненні да абвешчаных у вышук топ-мэнэджэраў ЗАТ «БКК» Алега Пятрова, Канстанціна Саладоўнікава, Ігара Еўстратава, Дзмітрыя Самойлава выдадзены міжнародны ордэр на арышт», - праінфармавалі ў СК.

У Следчым камітэце растлумачылі, што пералічаныя асобы «павінны быць затрыманыя ў краінах, якія ўваходзяць у Інтэрпол, з ужываннем меры стрымання ў выглядзе заключэння пад варту».

Чацвёра топ-мэнэджэраў ЗАТ «Беларуская калійная кампанія» адшукваюцца ў рамках расследавання крымінальных спраў, узбуджаных Генеральнай пракуратурай па ч.3 арт.424 «Злоўжыванне ўладай і службовымі паўнамоцтвамі». Падставай для распачынання крымінальных спраў паслужылі матэрыялы аб здзяйсненні гэтымі людзьмі відавочных злоўжыванняў службовымі паўнамоцтвамі ў карыслівых мэтах, якія прывялі да нанясення істотнай шкоды дзяржаўным і грамадскім інтарэсам Рэспублікі Беларусь, а таксама нанясенне ўрону ў асабліва буйным памеры ААТ «Беларуськалій» і ЗАТ БКК. Адзін з фігурантаў справы - старшыня назіральнага савета ЗАТ БКК Уладзіслаў Баўмгертнер - учора быў затрыманы і заключаны пад варту.