Амерыканскі вучоны даследуе беларускамоўную моладзь

• 18.08.2013, 21:34

Соцыялінгвіст, выкладчык Брандэйскага ўніверсітэта Курт Вулхайзер праводзіць у Беларусі і ва Украіне параўнальнае даследаванне «моўных аўтабіяграфій» беларускамоўнай і ўкраінскамоўнай моладзі.

Вучоны прыехаў у Гомель, каб даследаваць «новых беларускамоўных»: моладзь, якая вырасла ў рускамоўным асяроддзі, але мовай адносін у свядомым узросце абрала беларускую, піша «Комсомольская правда в Белоруссии».

«Мяне цікавіць моладзь, якая перайшла з рускай на беларускую мову, і наколькі ўплывае моўная палітыка ў краіне на моўны выбар моладзі, - распавёў Курт Вулхайзер, які добра валодае беларускай мовай. Цікавасць да мовы ўзнікла ў выніку даследавання гісторыі кнігадрукавання ў славян і асобы Францыска Скарыны . - Пра Францыска Скарыну ў нашых падручніках па гісторыі ўсходнеславянскіх моваў нічога не было напісана, у выніку я зразумеў, што гэта даволі закінутая тэма ў нашай славістыцы».

Дарэчы, амерыканец размаўляе па-беларуску чыста і без акцэнту, а першы раз ён наведаў Беларусь яшчэ ў 1990 годзе.