Матацыкліст па сустрэчнай уцякаў ад ДАІ ў Менску

• 10.08.2013, 17:03

Гонка пачалася ў Завадскім раёне. Мужчыну, які ехаў на матацыкле без апазнавальных нумароў, папрасіў спыніцца супрацоўнік ДАІ.

Матацыкліст на гэта ніяк не адрэагаваў. І нават павялічыў хуткасць. Пачалася пагоня, якая працягвалася па ўсім раёне. Матацыкліст ехаў з хуткасцю 100 кіламетраў у гадзіну, перыядычна выязджаў на сустрэчную і ігнараваў чырвоны сігнал святлафора, ледзь не пакалечыўшы людзей, якія пераходзілі дарогу на зялёны, паведамляе БелТА.

Праз некаторы час ДАІ ўдалося абрэзаць шляхі адступлення для ліхача, што прымусіла яго звярнуць у двор жылога дома. Там ён не справіўся з кіраваннем і ўпаў. Супрацоўнікі ДАІ яго адразу ж затрымалі.

Кіроўцу 31 год. Стаж кіроўцы складае больш за 15 гадоў, а матацыкл быў набыты зусім нядаўна і нават не зарэгістраваны. Ліхача чакаюць вялікія штрафы, бо пасля пагоні на яго было складзена 9 пратаколаў.