На М2 падчас начных гонак згарэў Bentley Continental GT

• 7.06.2013, 10:44

Мінулай ноччу на трасе М2 у сур'ёзную аварыю трапілі чатыры легкавых аўтамабіля - Volkswagen Bora, Audi 100, Rover і Bentley Continental GT.

Апошняя машына цалкам выгарэла. Адзін з карыстальнікаў форуму onliner.by сцвярджае, што ў гэты час праходзілі начныя гонкі стрытрэйсераў. Як пішуць відавочцы, віск тармазоў быў чутны нават у аэрапорце.

Нягледзячы на начны час, у гэтым месцы сабралася шмат людзей, абочыны былі застаўленыя аўтамабілямі. Карыстальнікі форуму сцвярджаюць, што гэта былі не аўтамабілісты, якія выпадкова праязджалі міма, а ўдзельнікі і гледачы вулічных гонак.

Вось што, у прыватнасці, паведамляе карыстальнік форуму NiceLife (тут і далей аўтарская арфаграфія і пунктуацыя захаваныя): «Еду з аэрапорта. Падобна на тое былі гонкі і адбылася аварыя. Некалькі разбітых машын прама на дарозе. Адна ледзь наводдаль на падзяляльнай гарыць адкрытым агнём. Няма ні ДАІ, ні пажарнікаў. Народу шмат, уся абочына застаўленая машынамі-гледачамі».

У МНС пацвердзілі, што ўначы быў выезд на трасу М2. «Аднак пажар не будзе лічыцца ўліковым, паколькі падчас узгарання аўтамабіль знаходзіўся ў руху», - растлумачылі пажарныя.

Пра абставіны аварыі відавочцы паведамляюць наступнае: Bentley у гонках не ўдзельнічаў, але ехаў на хуткасці больш за 250 км/г. Дзве машыны апынуліся ў кювеце і больш за пяць атрымалі пашкоджанні. Ёсць версія, што Bentley стаў сыходзіць ад сутыкнення з легкавіком, які разгортваўся праз падзяляльную паласу. Пасля гэтага кіроўца Bentley здзейсніў серыю сутыкненняў, яго машына таксама апынулася на падзяляльнай паласе і загарэлася. Ён ледзь паспеў выскачыць з салона.