Злачынцы абакралі стараверскую царкву пад Валожынам

• 4.06.2013, 13:45

У ноч на 29 траўня ў вёсцы Масцішча Валожынскага раёна са стараверскай царквы скралі пяць старадаўніх абразоў.

Пра гэта паведаміла 77-гадовая мясцовая жыхарка, якая звярнулася ў мясцовы РАУС, перадае прэс-служба МНС.

Па словах жанчыны, раніцай прыйшоўшы на працу, яна выявіла, што царква ўзламаная, частка рытуальных прадметаў раскіданая і прапалі некалькі абразоў.

Следча-аператыўная група, якая прыбыла на месца злачынства, высветліла, што царква не была абсталяваная сігналізацыяй. Зламыснікі, хутчэй за ўсё пры дапамозе гідраўлічных нажніц, перакусілі дужку магутнага замка і перапілавалі нажоўкай завалу.

Злачынцы выбралі пяць найбольш старых і каштоўных на іх погляд абразоў 19 стагоддзя: «Мікалай у 12 цудах», «Госпад-Усеўладны», «Маці Божая Пакрова», «Маці Божая з дзіцем» («Адзігітрыя»), «Уваход Гасподні ў Іерусалім».

Не выключана, што злодзеі могуць здзейсніць аналагічныя злачынствы і ў іншых раёнах краіны. Міліцыя просіць адгукнуцца тых, хто валодае любой інфармацыяй аб выкрадальніках.