«Трускалкавыя войны» са стралянінай на Палессі

• 17.06.2013, 15:15

Невядомыя напалі на грузавік, які перавозіў 500 кілаграм клубніц.

Жыткавіцкім раённым аддзелам Следчага камітэта Рэспублікі Беларусь распачатая крымінальная справа паводле факта хуліганства, учыненага з ужываннем зброі. Пра гэта паведамілі ва ўправе Следчага камітэта Рэспублікі Беларусь Гомельскай вобласці, паведамляе БелТА.

«12 чэрвеня пад 23.30 у Лунінецкім раёне Берасцейскай вобласці на аўтадарозе мяжа Расеі-Гомель-Кобрын і ў Жыткавіцкім раёне Гомельскай вобласці на аўтадарозе Менск-Мікашэвічы невядомыя, рухаючыся на двух аўтамабілях, з хуліганскіх памкненняў пераследвалі аўтамабіль «ГАЗ-3302». У яго бок было зроблена некалькі стрэлаў з паляўнічай стрэльбы», - растлумачылі ў Следчым камітэце.

У выніку абстрэлу пашкоджаныя колы, пасажырскія дзверы, рэгістрацыйны знак, задні ліхтар бартавой «газэлі», у якой перавозілася 500 кг трускаўкі. Кіроўца і пасажыр, абодва жыхары Менска, не пацярпелі.

Пацярпелыя праз мабільны тэлефоне звярнуліся па дапамогу ў органы ўнутраных спраў. На ўказанне дзяжурнага Жыткавіцкага РАУС на месца здарэння прыбыў бліжэйшы нарад міліцыі - супрацоўнік ДАІ, які нёс службу аховы грамадскага парадку ў вёсцы Ленін. Дзяржаўтаінспектары пачалі пераследваць правапарушальнікаў на службовым аўтамабілі з уключанымі пробліскавымі маячкамі. Кіроўцы не падпарадкаваліся законным патрабаванням аб прыпынку транспартных сродкаў і схаваліся.

Пры аглядзе месца здарэння выяўленыя і канфіскаваныя дроб, шрот, скрынка з-пад паляўнічых патронаў 16 калібру. Праводзяцца следчыя дзеянні і аператыўна-вышуковыя мерапрыемствы, накіраваныя на ўсталяванне ўсіх абставінаў таго, што адбылося, а таксама асоб, якія ўчынілі супрацьпраўнае дзеянне.