Дзёрзкая акцыя ў Дзень Перамогі ў цэнтры Масквы
- 9.05.2013, 20:32
(абноўлена - 20.45) Актывісты апазіцыі перацялі Цвярскую вуліцу ў Маскве з вялікім банэрам «Смерць крамлёўскім акупантам».
Яны запалілі фаер і пачалі рухацца праезнай часткай, скандуючы лозунгі «Расея без Пуціна», «Далоў паліцэйскую дзяржаву», «Свабоду палітвязням». Удзельнікі шэсця практычна цалкам заблакавалі рух на Цвярской.
Праз некалькі хвілін пасля пачатку шэсця на яго ўдзельнікаў накінуліся паліцэйскія. Затрыманыя 14 чалавек. Усе яны дастаўлены ў Цвярское АУС расейскай сталіцы.
Як паведаміў сайту charter97.org адзін з удзельнікаў акцыі, актывіст «Еўрапейскай Беларусі» Максім Вінярскі, супрацоўнікі паліцыі ўжывалі грубую сілу і збівалі затрыманых у аўтазаку.
Таксама сёння на Чыстых прудах былі затрыманыя 16 грамадзянскіх актывістаў, якія сабраліся з нагоды гадавіны народных пратэстных гулянняў у Маскве.
Нагадаем, 18 сакавіка ля сцен Крамля была праведзеная гэткая ж несанкцыянаваная акцыя, удзельнікі якой разгарнулі банер на Краснай плошчы, пратэстуючы супраць прапіскі. Яны таксама запалілі фаер і скандавалі антыпуцінскія лозунгі. Актывісты былі затрыманыя паліцыяй, пазней у дачыненні да іх была распачатая крымінальная справа паводле артыкулу «хуліганства».
Фото - Grani.ru