Да канца ліпеня Беларусь выплаціць $1,315 млрд па знешніх пазыках

• 15.05.2013, 17:31

Толькі за травень трэба знайсці на выплаты па пазыках $685,1 млн.

Гэта вынікае з апублікаваных Нацбанкам дадзеных аб міжнародных рэзервах і ліквіднасці па стане на 1 траўня 2013 года.

Да канца траўня нашай краіне трэба будзе выплаціць па знешніх пазыках каля $685,1 млн. Акрамя таго, да канца бягучага месяца павінна быць зарэзервавана $340,8 млн па ўмоўных абавязацельствах у замежнай валюце.

Агульная сума знешніх выплат у траўні складзе $1,026 млрд, піша Onliner.by.

На працягу чэрвеня-ліпеня 2013 года Беларусі неабходна выплаціць $630,3 млн па знешніх пазыках у замежнай валюце. Яшчэ $55,9 млн павінна быць зарэзервавана па ўмоўных абавязацельствах у замежнай валюце.

Агульная сума выплат па знешнім абавязку ў траўні-ліпені складзе рэкордныя $1,315 млрд, або ў сярэднім $438,3 млн у месяц.

Усяго на працягу бліжэйшага года, гэта значыць да 30 красавіка 2014-га, Беларусі неабходна выплаціць па знешніх пазыках каля $3,656 млрд.