Андрэй Саннікаў у Празе

• 10.05.2013, 11:59

У Бібліятэцы Вацлава Гавела прайшла сустрэча з лідарам «Еўрапейскай Беларусі».

Як перадае «Радыё Свабода», лідар грамадзянскай кампаніі «Еўрапейская Беларусь», былы палітвязень, кандыдат у прэзідэнты на выбарах 2010 года Андрэй Саннікаў прыехаў у Чэхію на прэм'еру спектакля «Праляцець праз вясёлку» па казках, якія ён з турмы пасылаў сыну Даніку.

Прэм'ера спектакля адбудзецца ў «Наіўным тэатры» ў горадзе Ліберцы ў суботу, 11 траўня.

П'есу па казках для Даніка напісаў чэшскі драматург, акцёр і рэжысёр Рэнэ Лявінскі, які піша пад рознымі псеўданімамі творы, разлічаныя на розныя катэгорыі гледачоў.

П'есу «Праляцець праз вясёлку» пераклаў на беларускую мову Сяргей Сматрычэнка, яе фрагменты чыталіся акцёрамі Свабоднага тэатра ў Менску некалькі месяцаў таму.

Напярэдадні прэм'еры ў Бібліятэцы Вацлава Гавела ў Празе адбылася сустрэча з Андрэем Саннікавым і аўтарамі спектакля.