У Беларусь вярнуўся яшчэ адзін Статут ВКЛ
- 30.04.2013, 15:00
«Музей гісторыі Магілёва» стаў уладальнікам яшчэ аднаго экземпляра Статута ВКЛ 1588г.
Пра гэта паведамляецца ў афіцыйным блогу музея ў Facebook.
«Дзякуючы ахвяраванням спадара Валерыя Казакова і дапамозе ў пошуках спадара Аляксандра Когана, УК «Музей гісторыі Магілёва» стаў уладальнікам яшчэ аднаго экземпляра Статута ВКЛ 1588 г. - гэты экзмпляр быў выдадзены ў 1744 г. у Вільні, на польскай мове, і потым належаў шляхцічу з Магілёўшчыны, Антонію Сабанскаму», паведамляюць прадстаўнікі музея.
Выданне прадстаўляе сабой зборнік з трох асобных выданняў: акрамя Статута ВКЛ у кнізе змяшчаюцца «Трыбунал ВКЛ» і «Інструктаж».
Экземпляр належаў прыватнай асобе ў горадзе Кастрама.
Музей выказвае падзяку эксперту, загадчыку аддзела публікацыі дакументаў Змітру Яцкевічу за атрыбутацыю знаходкі.
У мінулым годзе першы экземпляр Cтатута Вялікага Княства Літоўскага быў выкуплены за 45 тысяч даляраў. 30 тысяч даляраў было залічана на рахунак музея гісторыі Магілёва расейскай кампаніяй «Alpari», астатнія грошы - гэта ахвяраванні прыватных асоб. Гэта быў адзіны Статут у Беларусі.