Бердымухамедаў запрасіў Лукашэнку ў госці

• 14.03.2013, 11:19

Адбылася тэлефонная размова паміж прэзідэнтам Туркменістана Гурбангулы Бердымухамедавым і кіраўніком Беларусі Аляксандрам Лукашэнкам.

Пра гэта паведамляе прэс-служба прэзідэнта Туркменістана.

Падчас размовы кіраўнікі падкрэслілі наяўнасць спрыяльных перспектыў для пашырэння гандлёва-эканамічнага партнёрства, у прыватнасці, у аграрнай сферы. У гэтым кантэксце бакі адзначылі даўнія двухбаковыя сувязі ў галіне паставак беларускай сельскагаспадарчай тэхнікі, якая добра зарэкамендавала сябе ў глебава-кліматычных умовах Туркменістана.

У рамках размовы бакі таксама «абмяняліся меркаваннямі па шэрагу актуальных пытанняў рэгіянальнай і міжнароднай палітыкі, якія прадстаўляюць узаемны інтарэс».

Гурбангулы Бердымухамедаў запрасіў Лукашэнку наведаць Туркменістан з візітам у любы зручны для яго час. Гэта запрашэнне было прынята. Тэрміны візіту будуць узгодненыя па дыпламатычных каналах.