Чэргі на мяжы з Польшчай

• 9.02.2013, 13:41

9 лютага вялікія чэргі легкавога аўтатранспарту ўтварыліся на выезд з Беларусі ў Польшчу ў пунктах пропуску «Брузгі» і «Бераставіца».

Пра гэта паведаміў прэс-сакратар Дзяржаўнага памежнага камітэта Аляксандр Цішчанка.

Паводле ягонай інфармацыі, беларускай стараной ужо прапушчана пад 60 аўтамабіляў у кожным пункце пропуску, ідзе афармленне на польскай старане, але рух вельмі павольны. Магчыма, мяркуюць у беларускай памежнай управе, гэта звязана з расчысткай дарог пасля снегападу, перадае БелаПАН.

Паводле звестак Дзяржпамежкамітэта на 11.00 9 лютага, у чарзе ў «Брузгах» на выезд у Польшчу знаходзілася прыкладна 250 легкавікоў, у «Бераставіцы» - 170.

Аляксандр Цішчанка звярнуўся да аўтаўладальнікаў, якія збіраюцца выязджаць днямі ў Польшчу, з заклікам ўлічваць сітуацыю, якая склалася, тым больш што зноў чакаюцца снегапады, і, магчыма, адмовіцца ад паездак.