BE RU EN

Некалькі сотняў жыхароў Навагрудка засталіся без святла

  • 7.02.2013, 17:40

Электрычнасць знікла з-за пажару на трансфарматарным пункце, які адбыўся сёння ноччу.

Па прыбыцці да месца выкліку падраздзяленняў МНС было ўстаноўлена, што з трансфарматарнага пункта ідзе дым, з дзвярнога праёму выбіваецца полымя. У будынку знаходзяцца трансфарматары Т-1 і Т-2, якія забяспечваюць святлом жылы сектар Навагрудка.

Трансфарматарны пункт быў абясточаны, пасля чаго работнікамі МНС узгаранне было аператыўна ліквідавана.

У выніку пажару пашкоджаны трансфарматар Т-1. Часова засталіся без электраэнергіі 5 пяціпавярховых шматкватэрных і 12 прыватных жылых дамоў (усяго 760 чалавек) па вул. Чэхава, Чырвонаармейскай і Валчэцкага, а таксама інтэрнат № 1 ААТ «Навагрудскі завод газавай апаратуры», магазін «Вялікая крыніца». Аб'екты жыццезабеспячэння ў зону адключэння не патрапілі.

Меркаваная прычына пажару - парушэнне правілаў эксплуатацыі электрасетак і электраабсталявання.

Апошнія навіны