Тэракт на вакзале ў Валгаградзе: бомбу ўзарвала смяротніца (Відэа)
- 29.12.2013, 12:23
(абноўлена - 17:02) У Валгаградзе прагрымеў выбух у будынку чыгуначнага вакзала.
Ахвярамі выбуху ў Валгаградзе сталі не менш за 18 чалавек, больш за 40 атрымалі раненні. Следчы камітэт прызнаў выбух тэрарыстычным актам. Паводле папярэдніх дадзеных, выбуховае прыстасаванне прывяла ў дзеянне смяротніца. Гэта адбылося на ўваходзе ў вакзал, перад рамкай металашукальніка.
У інтэрнэце апублікаванае відэа выбуху на вакзале ў Валгаградзе.
Як паведаміла прадстаўнік абласнога Глаўка МУС Святлана Смальянінава, выбух «неўсталяванай прылады» адбыўся а 12:45 мск (11:45 па Менску).
Афіцыйны прадстаўнік Следчага камітэта Расеі Уладзімір Маркін заявіў, што крымінальная справа паводле факта выбуху ў Валгаградзе ўзбуджаная па двух артыкулах - тэракт і незаконны абарот зброі і боепрыпасаў.
Паводле папярэдніх дадзеных, магутнасць бомбы ў Валгаградзе склала не менш за 10 кг у трацілавым эквіваленце.
У сваю чаргу «Інтэрфакс» паведамляе, што на месцы выбуху на чыгуначным вакзале ў Валгаградзе выяўленая адарваная галава меркаванай тэрарысткі-смяротніцы.
Сярод ахвяраў тэракту ў Валгаградзе ёсць супрацоўнік праваахоўных органаў. Паводле папярэдніх дадзеных, паліцэйскі Дзмітрый Макавін загінуў пры выбуху, калі спрабаваў прадухіліць падрыў смяротніцы. Ён убачыў спыненую пры праходжанні турнікета дзяўчыну, якая дзіўна захоўвалася, - паведамляюць Lifenews.
У той момант, калі дзяўчына рэзка кінулася наперад, ён ступіў да яе насустрач, каб перашкодзіць прайсці ўнутр вакзала. У тую ж хвіліну прагрымеў выбух. Ад атрыманых раненняў Дзмітрый Макавін загінуў на месцы.
У прэс-цэнтры МУС Расеі ўдакладнілі, што адзін паліцэйскі загінуў і шасцёра параненыя пры тэракце ў Валгаградзе.
«Па ўдакладненых дадзеных, у выніку выбуху на чыгуначным вакзале ў Валгаградзе адзін супрацоўнік паліцыі загінуў, яшчэ шасцёра яго калегаў былі параненыя», - сказаў суразмоўца агенцтва. Адзін з параненых паліцэйскіх знаходзіцца ў цяжкім стане.
На месцы здарэння працуюць выбухатэхнікі, АМАП і кінолагі з сабакамі. Са слоў відавочцаў, да будынка вакзала адна за адной пад'язджаюць брыгады медыкаў, іх шмат. Пацярпелых на насілках загружаюць у карэты «хуткай дапамогі» і адвозяць у бальніцы. З будынка чыгуначнага вакзала працягваецца эвакуацыя людзей.
У пятніцу ўвечары ў Пяцігорску Стаўрапольскага краю ля будынка ДІБДР выбухнула начыненая выбухоўкай машына. Загінулі трое выпадковых мінакоў. Улады шукаюць арганізатара, але мяркуюць, што гэта не тэракт.