МАЗ у абмен на адмену нафтавых пошлін
- 19.12.2013, 9:28
Лукашэнка набівае цану беларускіх актываў, якія паступова ператвараюцца ў пасівы.
Такое меркаванне выказаў эксперт Антон Балтачко, пракаментаваўшы аднаўленне беларускім бокам актыўнасці на ніве стварэння беларуска-расейскіх сумесных прадпрыемстваў.
На пасяджэнні Прэзідыума Саўміна, які прайшоў 17 снежня, першы віцэ-прэм'ер Уладзімір Сямашка далажыў інфармацыю аб стварэнні беларуска-расейскага холдынгу «Расбелаўта», аб інтэграцыі ААТ «Інтэграл» з ААТ «Расэлектроніка» (ГК «Растэхналогіі»), аб інтэграцыі ААТ «МЗКЦ» у структуру абаронна-прамысловага комплексу Расеі, аб праекце ААТ «Пеленг» і ФКА «Раскосмас», а таксама аб праекце будаўніцтва новага азотнага комплексу ў ААТ «Гродна Азот», піша camarade.biz.
У прыватнасці, закранаючы тэму аўтамабільнага холдынгу, чыноўнік адзначыў, што ў цяперашні час падпісаная дамова з кансорцыумам Chadbourne&Parke LLP і Sorainen на правядзенне юрыдычнай экспертызы магчымасці заключэння і рэалізацыі дамовы давернага кіравання акцыямі МАЗа і КамАЗа. Дадзены праект прадугледжвае стварэнне холдынгавай структуры шляхам перадачы ёй адпаведных пакетаў акцый абедзвюх кампаній (75% плюс адну акцыю перадасць МАЗ і 49,9% - КамАЗ).
З чым жа звязаная рэанімацыя такой актыўнасці? На думку Антона Балтачко, «гэта называецца лоўляй на мармышку: неабходныя невялікія паторгванні, каб прыцягваць, спакусіць рыбу. У дадзенай сітуацыі Расея - гэта жаданая рыба, якой Сямашка нагадвае, што мы тут».
Эксперт упэўнены, што рэўнасць беларускага кіраўніцтва да ўласнасці пакуль яшчэ не дае магчымасці ажыццявіць праект па аб'яднанні, але як толькі патрэба ў расейскіх грошах перавысіць гэта пачуццё рэўнасці, тады праект па СП «будзе зроблены за месяц». Тым больш, што прыкладна ў наступным годзе будзе вырашацца важнае пытанне па адмене экспартнай пошліны на нафтапрадукты і іншых выключэнняў, што супадае з тэрмінамі па стварэнні СП, абвешчанымі Сямашка, звяртае ўвагу эканаміст.
Лукашэнка неаднаразова казаў, што не бачыць выгады ад стварэння аўтамабільнага СП. Больш за тое, ён таксама заяўляў, што за расейцамі «стаяць замежнікі, якія зацікаўленыя ў тым, каб МАЗ закрыць»: «Я на гэтую бандыцкую акцыю не пайду». Акрамя гэтага, зусім нядаўна Лукашэнка выступіў супраць продажу Менскага завода колавых цягачоў замежнаму інвестару.
Дык няўжо кіраўніка загналі ў кут, і ў яго не засталося іншых хадоў? Эксперт кажа, што Лукашэнка добры маркетолаг: «Ён набівае цану беларускіх актываў, якія паступова ператвараюцца ў пасівы».
Балтачко згаджаецца, што цяпер у МАЗа не лепшыя часы, але казаць, што ён у заняпадзе - нельга. «Вось і набіваюць яму цану, каб потым было прасцей і з большай выгадай зрабіць СП. У кут Лукашэнку пакуль ніхто не загнаў», - перакананы ён.
Гаворачы ж пра будучую выгаду, ён адзначыў, што на сённяшні дзень ясна толькі тое, што холдынг будзе стварацца на парытэтных пачатках: «Калі ўсё будзе так, як сказаў Сямашка, то мы атрымаем другую БКК, толькі ў сферы аўтамабілебудавання - невялікая групоўка, якая будзе цалкам выгадная для абедзвюх краін. Для Беларусі - у частцы доступу да новых збытавыя ліній, для Расеі - у частцы прамысловай кааперацыі паміж двума заводамі. Аднак пакуль не будуць вядомыя ўсе ўмовы здзелкі, казаць пра канкрэтныя выгоды будзе няправільна».
Незалежныя эксперты не раз заяўлялі, што без прыватызацыі Беларусі прыйдзецца цяжка. Гэта прызнаюць і ў дзяржорганах. Так, кіраўнік Нацыянальнага банка Надзея Ермакова, адказваючы сёння на пытанне, за кошт чаго Беларусь можа ў наступным годзе павялічыць золатавалютныя рэзервы да $8,5 млрд, акрамя станоўчага знешнегандлёвага сальда, замежных інвестыцый, размяшчэння еўрабондаў, назвала і продаж дзяржуласнасці замежнаму інвестару.
Што ж можа сысці з малатка ў першую чаргу? Па словах Антона Балтачко, усё залежыць ад эканамічнага стану Беларусі і ад неабходных аб'ёмаў сродкаў. «Трэба разумець, што прыватызацыя ў Беларусі ў якасці крыніцы сродкаў разглядаецца на апошнім месцы. А як павышэнне эфектыўнасці работы эканомікі яна наогул не разглядаецца», - лічыць эксперт.
Таму, на яго думку, калі Беларусі трэба будзе некалькі мільярдаў даляраў, а крэдытаў не будзе, то на продаж можа пайсці адзін з НПЗ, тым больш пакупніка доўга шукаць не трэба - гэта кіраўнік «Раснафты» Ігар Сечын. «Але гэта адбудзецца толькі ў выпадку, калі грошы патрэбныя будуць, як гаворыцца, ужо ўчора», - падкрэсліў эканаміст.