Міліцыянт вымагаў у бізнесмена хабар у $4000

• 15.11.2013, 16:33

Чатыры тысячы даляраў патрабаваў гродзенскі работнік міліцыі за ўтойванне інфармацыі аб правапарушэнні.

Працуючы на пасадзе старэйшага оперупаўнаважанага УРТЭП УУС Гродзенскага аблвыканкама, К. у ходзе аператыўна-вышуковай дзейнасці атрымаў матэрыялы аб учыненых мясцовым бізнесменам правапарушэннях. За тое, што ён не дасць справе ходу і не накіруе матэрыялы ва УДФР КДК па Гродзенскай вобласці, міліцыянт патрабаваў ад бізнесмена грашовае ўзнагароджанне ў суме 4000 даляраў. Прычым зрабіў гэта не сам, а прыцягнуў у якасці пасярэдніка свайго знаёмага. Сіламі праваахоўных органаў пасярэднік быў затрыманы пасля перадачы яму бізнесменам хабару, піша «Гродненская правда».

Аддзелам па Гродзенскай вобласці Галоўнага ўпраўлення па расследаванні злачынстваў у сферы арганізаванай злачыннасці і карупцыі Следчага камітэта Рэспублікі Беларусь у дачыненні да старэйшага оперупаўнаважанага ўзбуджаная крымінальная справа, але сам ён схаваўся ад органаў дазнання і папярэдняга следства, да гэтага часу яго месца знаходжання невядомае.