Расейскім дыпламатам дазволілі сустрэцца з Баўмгертнерам

• 13.11.2013, 10:48

Месца і час правядзення сустрэчы будуць прызначаныя пазней.

Беларуская пракуратура дазволіла прадстаўнікам расейскага дыпламатычнага ведамства сустрэцца з затрыманым генеральны дырэктарам кампаніі «Уралкалій» Уладзіславам Баўмгертнерам, перадае РІА «Новости».

«Раніцай мы атрымалі дазвол па факсе ад пракуратуры на сустрэчу з Баўмгертнерам, датаваны 11 лістапада», - паведамілі ў амбасадзе.

Удакладняецца, што месца і час правядзення сустрэчы будуць прызначаныя пазней.

Першы запыт аб сустрэчы, на які амбасада не атрымала адказ, быў накіраваны яшчэ 1 лістапада.

Гандлёвыя адносіны Расеі і Беларусі абвастрыліся пасля арышту ў аэрапорце Менска гендырэктара «Уралкалію» Уладзіслава Баўмгертнера па падазрэнні ў злоўжыванні службовымі паўнамоцтвамі і нанясенні шкоды Беларусі. СК Беларусі распачаў крымінальныя справы супраць Сулеймана Керымава, кіраўніка «Уралкалію» і іншых топ-мэнэджэраў кампаніі. На дадзены момант Баўмгертнер знаходзіцца пад хатнім арыштам на здымнай кватэры ў Менску.

Па дадзеных следства, агульны аб'ём нанесенай шкоды склаў каля $100 млн.

Фота: vedomosti.ru