Кірыл Шымко супраць танка Т-26 (Відэа)
- 8.10.2013, 10:12
Новы сусветны рэкорд устанавіў беларускі асілак Кірыл Шымко - ён зрушыў з месца і працягнуў за сабой савецкі танк Т-26 масай 11,5 тоны.
Рэкорд быў устаноўлены 4 кастрычніка ў рамках выставы камп'ютэрных гульняў «Іграмір», якая праходзіла ў Маскве. Арганізатарам мерапрыемства стала кампанія-распрацоўшчык відэагульняў Wargaming.net LLP, якая выпусціла папулярную анлайн-гульню «Свет танкаў», пры падтрымцы маскоўскага выставачнага цэнтра «Крокус Экспа». Танк для ўстанаўлення рэкорду падаў музей ваеннай тэхнікі ў Кубінцы.
«Танк часоў вайны, іржавыя механізмы, наяўнасць гусеніц , якія зрушваць нашмат складаней, чым колы. Яшчэ адна спецыфіка - танк прыйшлося заводзіць, інакш спрацоўвалі б тармазы», - распавёў Кірыл Шымко ў каментары БелаПАН.