На набярэжнай Свіслачы жорстка збілі хлопца і дзяўчыну

• 17.10.2013, 15:42

У ноч з суботы на нядзелю на набярэжнай ракі Свіслач збілі 20-гадовых хлопца і дзяўчыну.

Міліцыя ўстанаўлівае магчымых відавочцаў.

Хлопец і дзяўчына выйшлі на набярэжную Свіслачы на шпацыр. Калі маладыя людзі знаходзіліся насупраць дома 34а па вуліцы Чырвонаармейскай, на іх хтосьці накінуўся. У выніку абодвум былі прычыненыя цяжкія цялесныя пашкоджанні ў вобласці галавы.

У цяперашні час абставіны здарэння, а таксама прыкметы падазронага або падазраваных не ўстаноўленыя, паведамляе прэс-служба ГУУС.

Узбуджаная крымінальная справа па прыкметах складу злачынства, прадугледжанага часткай 3 артыкула 147 КК (наўмыснае прычыненне цяжкіх цялесных пашкоджанняў). Праводзіцца расследаванне.

Супрацоўнікі міліцыі звяртаюцца да магчымых відавочцаў здарэння і просяць паведаміць пра гэта ў дзяжурную частку Ленінскага РУУС.