Хакеісты «Шахцёра» абвясцілі байкот

• 17.10.2013, 7:37

У «Беларуськалію» няма грошай на тое, каб падтрымаць клуб, генеральным спонсарам якога ён з'яўляецца.

З-за адсутнасці зарплаты хакеісты «Шахцёра» маюць намер 18 кастрычніка байкатаваць матч чэмпіянату краіны супраць «Віцебска». Пра гэта паведаміў галоўны трэнер салігорскай каманды Андрэй Гусаў на прэс-канферэнцыі пасля заканчэння хатняй гульні супраць наваполацкага «Хіміка-СКА» (1:3), паведамляе прэс-служба клуба.

«Я не ведаю, як заходзіць да хлопцаў у распранальню і што казаць падапечным. Я проста стаміўся, і ад бяссілля змяніць сітуацыю іншы раз хочацца выць. Людзі прыходзяць на трэніроўку, на гульню, але не думаюць пра хакей. У іх адна думка - як пракарміць свае сем'і.

Я ўжо не ведаю, да каго звяртацца. Толькі што, капітан і яго асістэнты падышлі да мяне і сказалі, што каманда не выйдзе на наступны матч супраць «Віцебска». Таму што працаваць у такіх умовах проста невыносна. Тут няма нічога ад прафесійнага спорту, тут няма нічога ад прафесіяналізму. Людзі рубяцца, змагаюцца, абматаныя усё, у бінтах, з лёдам сядзяць, без зубоў - я заходжу ў распранальню, гляджу на іх, і мне плакаць хочацца», - сказаў ён.

Генеральным спонсарам «Шахцёра» з'яўляецца ААТ «Беларуськалій». Пасля 15 матчаў каманда з 19 ачкамі займае 7-е месца сярод 10 удзельнікаў чэмпіянату.