«Падатак на дармаедаў» увядуць праз год?

• 14.10.2013, 8:56

Ідэя ўладаў аб увядзенні падатку на афіцыйна непрацуючых беларусаў блізкая да рэалізацыі.

Пра гэта піша «Белорусский партизан», у распараджэнні якога апынуліся праект указу Лукашэнкі, пастановы ўрада і рашэнне Міністэрства працы і сацыяльнай абароны.

Як сведчаць дакументы, якія апынуліся ў распараджэнні «Белорусского партизана», чарговыя паборы з насельніцтва ўлады хочуць увесці з 1 студзеня 2015 года.

Ужо складзены праект указа «Аб некаторых мерах па ўдзелу грамадзян у фінансаванні выдаткаў дзяржавы», праект закона «Аб парадку ўзаемадзеяння органаў дзяржаўнага кіравання і іншых зацікаўленых арганізацый па забеспячэнні ўдзелу грамадзян у фінансаванні дзяржаўных расходаў у адпаведнасці з указам прэзідэнта», абгрунтаванне, падрыхтаванае міністэрствам працы і сацыяльнай абароны. Абгрунтаванне падпісана намеснікам міністра працы Пятром Грушнікам, які ўжо тлумачыў афіцыйна сэнс новага падатку.

Мяркуецца, што будзе сфармаваная база дадзеных на ўсіх жыхароў РБ ва ўзросце ад 18 да 55 (жанчыны)/60 (мужчыны) гадоў. Стварэннем базы даручылі заняцца МУС. У базу дадзеных уключаць усіх беларусаў, хто фармальна нідзе не працуе.

Папярэдне вызначаная і сума падатку, які прыйдзецца плаціць людзям. Да 1 чэрвеня бягучага года, трэба будзе аплаціць падатак у памеры 20 базавых велічынь (будзе пераглядацца штогод).

За нявыплату або няпоўную выплату грамадзяне будуць прыцягнутыя да адказнасці, устаноўленай заканадаўствам за нявыплату непадатковых даходаў бюджэту базавага ўзроўню.

Увесь збор інфармацыі, захоўванне і яе выкарыстанне будзе весціся без згоды грамадзян.

Савету Міністраў на працягу паўгода даручана вызначыць парадак збірання плацяжу з грамадзян, забяспечыць прывядзенне актаў заканадаўства ў адпаведнасці з гэтым указам і прыняць іншыя меры.

Падаткавікі павінны будуць забяспечыць кантроль за паступленнямі падатку на «беспрацоўных» у казну.

Аблвыканкамы павінны забяспечыць працу ўказа на сваіх тэрыторыях.

Таксама ў праекце закона ўстаноўленыя асобы, якія выключаюцца ад выплаты гэтага падатку, грамадзяне, якія на працягу 6 месяцаў каляндарнага года атрымлівалі даход:

- Па кантракце або па грамадзянска-прававой дамове (прадметам якіх з'яўляецца аказанне паслуг, стварэнне аб'ектаў інтэлектуальнай уласнасці); грашовае забеспячэнне ваеннаслужачых, у тым ліку рэзервістаў; дапамога на дзяржслужбе; дапамога бацькам-выхавацелям, апекунам, прыёмным бацькам; даход у замежнай валюце (гэты спіс зацвердзіць Савет Міністраў); дзяржаўная пенсія; дапамога за дзіцем да 3-х гадоў; дапамога па догляду за дзіцём-інвалідам, за інвалідам 1 групы або за пажылым ва ўзросце ад 80 гадоў, калі яму патрабуецца догляд; штомесячная страхавая выплата з нагоды НЗ на рабоце; стыпендыі.

Таксама вызваляюцца ад выплаты ІП, прыватныя натарыусы, адвакаты, прадпрымальнікі ў сферы аграэкатурызму, людзі, якія здаюць унаём кватэры, грамадзяне, якія зарэгістраваныя ў якасці беспрацоўных на біржы працы, выпускнікі (да 1 верасня), студэнты.

Грамадзяне, якія адбываюць заключэнне; часова непрацаздольныя ў выніку хваробы; бацькі, якія вядуць гаспадарку і выхоўваюць 3 і больш дзяцей ва ўзросце да 16 гадоў.

У абгрунтаванні ўказу згадваецца 56 артыкул канстытуцыі, у якім пазначана, што грамадзяне абавязаныя прымаць удзел у фінансаванні дзяржаўных выдаткаў шляхам выплаты дзяржаўных падаткаў, пошлін і іншых плацяжоў.

Па ацэнцы ўрада, у першы год прыняцця ўказа, у бюджэт павінна паступіць каля 400 мільярдаў рублёў, а ў далейшым змяншацца, так як беларусы будуць працаўладкоўвацца больш актыўна.

У дакуменце пазначаныя і негатыўныя наступствы, да якіх можа прывесці прыняцце ўказа:

1. Немагчымасць запатрабаваць падатак з асоб, якія вядуць асацыяльны лад жыцця, грамадзян выяўленых, але не знойдзеных і гэта прывядзе да росту запазычанасці перад бюджэтам.

2. Узнікненне судовых цяжбаў (з асобамі, якія не згодныя або з тымі, якія не маюць магчымасці заплаціць падатак).

3. Рост узроўню рэгіструемага беспрацоўя.

4. Стварэнне сацыяльнай напружанасці ў грамадстве.

Нагадаем, два тыдні таму стала вядома, што ў Беларусі прапрацоўваецца пытанне па вызначэнні механізму кампенсацыі непрацуючым эканамічна актыўным насельніцтвам часткі дзяржаўных выдаткаў на аказанне ім і іх сем'ям сацыяльных і іншых паслуг, якія датуюцца дзяржавай. Пра гэта паведаміў першы намеснік міністра працы і сацыяльнай абароны Пётр Грушнік на анлайн-канферэнцыі, якая прайшла на сайце ведамства.

Чыноўнік адзначыў, што ў адпаведнасці з артыкулам 56 Канстытуцыі Рэспублікі Беларусь грамадзяне абавязаныя прымаць удзел у фінансаванні дзяржаўных выдаткаў шляхам выплаты дзяржаўных падаткаў, пошлін і іншых плацяжоў.